Xəbər verdiyimiz kimi, Qazaxın 4 kəndinin Azərbaycana qaytarılması barədə Ermənistanla razılıq əldə edilib. Bu barədə aprelin 19-da keçirilən Azərbaycan ilə Ermənistan arasında dövlət sərhədinin delimitasiyası üzrə Dövlət Komissiyası və Ermənistan ilə Azərbaycan arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın səkkizinci görüşündə razılıq əldə olunub.
Sevindirici xəbərlə bağlı Beynəlxalq Avrasiya Mətbuat Fondunun prezidenti Umud Mirzəyev Ednews-a açıqlamasında bildirib ki, Azərbaycan adına çox böyük tarixi hadisələrə şahidlik edirik:
"Qarabağ faciəsini düşündükcə, ümumiyyətlə, Ermənistan Azərbaycan münaqişəsinin başlanğıcı Bağanis Ayrım faciəsi ilə yadda qalıbdır. Bağanis Ayrım xalqımızın tərcüməyi halında çox ağrılı bir məkandır. İnsanlarımız orada çox böyük acılar yaşayıb. Bildirmək istəyirəm ki, son 30 ildə çıxışlarımda bütün fikirlərimdə demək olar ki, doğulub boya başa çatdığım Aşağı Əbdürrəhmanlı ilə aşağı Əskipara kəndinin adını qoşa çəkmişəm. Bu iki kənd 30 ildə yaşanan facilərin hamısına şahidlik edib".
U.Mirzəyev mərhum şair Əski Para kəndindən olan Şaiq Vəlini də xatırlayıb:
"Xüsusilə vurğulamaq istəyirəm ki, Aşağı Əskipara kəndi mənim üçün həqiqətən çox dəyərlidir. Bu kəndi ürəyimin yanan bir parçası kimi xatırlayıram. Mərhum şair Şaiq Vəli bu kəndin çox böyük ziyalısı idi. Allah ona qəni-qəni rəhmət eləsin. Bu gün əziz dostumun ruhu şaddır ki, torpağımız qayıdır. Hadisələrin hamısı haqqın, ədalətin bərqərar olması deməkdir. Bir ifadə var "Haqq nazilər, amma üzülməz". Baş verən hadisələrin hamısı buna sübutdur".
U.Mirzəyəv qeyd etdi ki, Azərbaycan xalqının 30 illik siyasəti, iqtisadiyyatının təməli və xarici siyasətinin bünövrəsi, ordu quruculuğu düzgün qurulub:
"Bütün bunlar Ulu öndər Heydər Əliyevdən başlanan və bu gün də davam edən uğurlu siyasətin nəticələridir. Həmçinin bu tarixi hadisə Azərbaycan xalqının yenilməzliyini sübut edir. Bütün Azərbaycan xalqını təbrik edirəm. Döyüşsüz, silahsız və əsas da qan tökülmədən bu məsələ həll yolunu tapdı. Fikirlərimi sözlə ifadə etməkdə çətinlik çəkirəm. Kənar qüvvələrin müdaxiləsi olduğu halda liderimizin bu siyasəti həqiqətən qələbədir".
Oğuz
