Gürcüstanda "xarici agentlər" qanununa qarşı etirazlar davam edir. “Xarici təsirin şəffaflığı haqqında” qanun, şübhəsiz ki, gürcü cəmiyyəti üçün bir növ mübahisə obyektinə çevrilib və bir sıra analitiklərin fikrincə, Gürcüstanda onun qəbulu ilə bağlı dinc konsensusdan söz gedə bilməz. Artıq Avropa İttifaqı da ixtişaşları dayandırmağa və vətəndaşlara qarşı şiddətdən yayınmağa çağırıb.
Qonşu ölkədə baş verən bu etirazlar nə ilə nəticələnəcək?
Gürcüstanın keçmiş təhsil və elm naziri, Qafqaz Sülh, Demokratiya və İnkişaf İnstitutunun direktoru Gia Nodia Ednews-a özəl müsahibəsində məsələni şərh edib. O, bu layihənin Gürcüstanın Avropaya inteqrasiya layihəsinin dayandırılması mənasına gəldiyini söyləyib.
"Bu, Gürcüstan üçün həqiqətən də dönüş nöqtəsidir, çünki bu qanunun qəbulu Avropaya arxa çevirməkdir. Təbii ki, hakim partiya bunu formal olaraq etiraf etməz, amma Avropa reaksiyasından da görürük ki, Aİ- nin namizəd ölkəsi üçün bu, tamamilə qəbuledilməzdir. Ona görə ki, bu qanun hər hansı Avropa norma və dəyərlərinə tamamilə ziddir və güman edirəm ki, keçmiş baş nazir Bidzina İvanişvili başa düşür ki, bu qanunun qəbul edilməsi Gürcüstanın Avropaya inteqrasiya layihəsinin dayandırılması deməkdir. Gürcüstan ictimaiyyətinin böyük bir hissəsi bunu belə görür və buna görə də bizdə bu qanunun geri götürülməsini tələb edən çox böyük etirazlar keçirilir. Lakin biz əlbəttə ki, buna nail olub-olmadıqlarını bilmirik, amma hətta əgər hökumət keçən il olduğu kimi bu qanun layihəsini geri götürmək qərarına gəlsə, bunun ictimaiyyət üçün yetərli olacağını düşünmürəm, çünki bu epizod İvanişvilinin həqiqətən də Gürcüstanın ənənəvi, rus dünyasına, rus siyasi məkanına, ənənəvi avrointeqrasiya siyasətinə qarşı olduğunu və Gürcüstanı geriyə apardığını göstərdi. Deməli, qanun qəbul edilib-edilməsə də, düşünürəm ki, mübarizə davam edəcək, lakin necə davam edəcək, heç kim - nə etiraz edənlər, nə də hakimiyyət bilmir.
Gürcü politoloq hesab edir ki, baş verən iğtişaşların yaxın tarixdə bitəcəyi gözlənilmir:
Hesab edirəm ki, etirazlar kifayət qədər genişdir. Böyük əksəriyyəti gənclərdir. İndi son günlər Gürcüstanın müxtəlif bölgələrindən gələnlərin sayı artır, ona görə də etiraz aksiyası əslində bir mərkəz tərəfindən təşkil olunmur. Özlərini təşkil edən müxtəlif qruplar var, ona görə də bunun belə inkişaf edib-etməyəcəyini bilmirik, amma indiyə qədər insanlar bunun xüsusi olaraq heç kim tərəfindən təşkil edilməmiş, mərkəzləşdirilməmiş olmasına üstünlük verirlər. Beləliklə, bizdə bu qeyri-müəyyənlik və çoxlu narahatlıq var, ona görə də hələlik biz bunun tezliklə bitəcəyini gözləmirik.
Əkbər Novruz